დავით პეტრიაშვილის სახელობის არენა ეროვნული ლიგა 2-ის უმნიშვნელოვანეს შეხვედრას ელოდება. 28-ე ტურის მატჩში „გაგრა“ მარტვილის „მერანს“ უმასპინძლებს. ჩვენი გუნდისთვის ამ თამაშს ოქროს ფასი აქვს. თუ დენის ხომუტოვის გუნდი მოიგებს, მას აქვს შანსი მყარად დაიმკვიდროს ადგილი საპრიზო სამეულში. მარტვილელები კი ლიგა 2-ში დარჩენისთვის იბრძვიან და ბუნებრივია, რომ იოლად არაფერს დათმობენ.
საქმე ისე აეწყო, რომ „მერანი“ ჩვენებისთვის უხერხულ მეტოქედ ჩამოყალიბდა. გუნდები აქამდე 13 ჯერ შეხვდნენ ერთმანეთს და 7 თამაში „მერანმა“ მოიგო, 3 „გაგრამ“, 3 მატჩი კი ფრედ დასრულდა. აღსანიშნავია, რომ წლევანდელ სეზონში ჩვენებს მარტვილელები ჯერ არ დაუმარცხებიათ. 2 ჯერ „მერანმა“ იმარჯვა, ერთი შეხვედრა კი მარტვილში ფრედ – 0:0 დასრულდა.
შესაბამისად, „გაგრა“ რევანშისთვის არის განწყობილი და გუნდი მხოლოდ გამარჯვებისთვის იბრძოლებს. ამ თამაშისთვის ჩვენები მუხრანის ბაზაზე ემზადებოდნენ და კარგა გვარიანადაც ღვარეს ოფლი. გუნდს ტრავმის გამო დანაკლისი არ ექნება. ერთადერთი გამონაკლისი ავთანდილ ბრაჭულია, რომელიც „გაგრას“ სეზონის ბოლომდე ვეღარ დაეხმარება. დანარჩენები კი მწყობრში არიან და შემტევი ფეხბურთის თამაშს აპირებენ.
დენის ხომუტოვი („გაგრას“ მთავარი მწვრთნელი): „ჩვენთვის მხოლოდ გამარჯვება იქნება მისაღები შედეგი. ამიტომ შემტევ ფეხბურთს ვითამაშებთ. გუნდში საბრძოლო განწყობაა. ბიჭებმა კარგად იციან ამ მატჩის მნიშვნელობა და შესაბამისი განწყობით გამოვლენ მინდორზე. ტრავმირებულები არ გვყავს. რაც შეეხება მეტოქეს, მის თამაშს კარგად ვიცნობთ. „მერანის“ რამდენიმე ფეხბურთელი – ხინთიბიძე, ზახარჩენკო, ტყეშელაშვილი, წარსულში ჩვენი გუნდის ღირსებას იცავდნენ. შესაბამისად, მათი თამაშის სტილი ჩვენთვის ცნობილია. უდავოდ რთული თამაში იქნება, მაგრამ ჩვენ ამისთვის მზად ვართ.“
შეგახსენებთ, რომ გაგრასა და მერანის შეხვედრა დავით პეტრიაშვილის სახელობის არენაზე 15 საათზე დაიწყება.
ურთიერთშეხვედრები:
14/11/2010 ელ2 მერანი – გაგრა 1:0
08/05/2011 ელ2 გაგრა – მერანი 3:1
07/08/2011 ერლ გაგრა – მერანი 3:0
30/10/2011 ერლ მერანი – გაგრა 1:0
24/11/2011 თასი გაგრა – მერანი 4:0
07/12/2011 თასი მერანი – გაგრა 2:0
04/03/2017 ელ2 მერანი – გაგრა 0:0
04/05/2017 ელ2 გაგრა – მერანი 1:0
21/07/2017 ელ2 მერანი – გაგრა 2:1
26/09/2017 ელ2 გაგრა – მერანი 0:1
03/03/2018 ელ2 მერანი – გაგრა 0:0
05/05/2018 ელ2 გაგრა – მერანი 0:2
03/08/2018 ელ2 მერანი – გაგრა 3:1
*ელ2 – ეროვნული ლიგა2, ერლ – ეროვნული ლიგა, თასი – საქართველოს თასი