წყალტუბოს „სამგურალისა“ და „გაგრას“ დაპირისპირება 2010 წლიდან იღებს სათავეს. სულ გუნდები 11 ჯერ შეხვდნენ ერთმანეთს. აქედან 6 თამაში „გაგრამ“ მოიგო, 3 „სამგურალმა“, ხოლო 2 მატჩი ფრედ დასრულდა. ბურთების შეფარდება – 16:9 „გაგრას“ სასარგებლოდ. აღსანიშნავია, რომ წლევანდელ სეზონში „გაგრამ“ სამივე თამაში მოუგო მეტოქეს და შეეცდება ეს სასიამოვნო სტატისტიკა კიდევ გააგრძელოს. მით უფრო, რომ ჩემპიონატი ფინიშის სწორზე გავიდა და თითოეულ ქულას დიდი მნიშვნელობა ენიჭება.

თამაში მარტვილში, მურთაზ ხურცილავას სახელობის სტადიონზე ხვალ გაიმართება. გუნდი დასავლეთ საქართველოში დღეს გაემგზავრა.

სატურნირო ცხრილში ისეთი მდგომარეობა შეიქმნა, რომ „სამგურალი“ ბოლო ადგილზეა და გადარჩენისთვის იბრძვის, ჩვენ გუნდს კი ეროვნულ ლიგაში აღზევება სურს, ამიტომ ფეხბურთელებიც და მწვრთნელებიც დაძაბული თამაშისთვის ემზადებიან.

„გაგრა“ ამ მატჩისთვის მუხიანში ვარჯიშობდა. ყველა ფეხბურთელი მწყობრშია და გათავისებული აქვს ხვალინდელი შეხვედრის მნიშვნელობა. თუ ჩვენები მოიგებენ, ისინი საგრძნობლად განიმტკიცებენ მდგომარეობას საპრიზო სამეულში და პლეი ოფის მატჩებს კიდევ უფრო მიუახლოვდებიან. ამიტომ დენის ხომუტოვის გუნდი მხოლოდ გამარჯვებისთვის იბრძოლებს.

თორნიკე გაფრინდაშვილი („გაგრას“ შემტევი ნახევარმცველი): „ამ თამაშისთვის საფუძვლიანად მოვემზადეთ, ვიცით, რომ რთული და დაძაბული მატჩი იქნება, მაგრამ ჩვენთვის ძალიან მნიშვნელოვანი თამაშია, ამიტომ მხოლოდ მოგებისთვის ვიბრძოლებთ. ბიჭები კარგ ფორმაში არიან. ტრავმის გამო უკვე დიდი ხანია ავთანდილ ბრაჭული გვაკლია, სხვას არავის აწუხებს და შევეცდებით საკუთარი თამაში მოვახვიოთ მეტოქეს. „სამგურალი“ კარგი გუნდია, მას პატივს ვცემთ, ვიცით, რომ შეცდომებს არ გვაპატიებს, ამიტომ მაქსიმალური მობილიზებით გავალთ მინდორზე და გამარჯვებისთვის ვიბრძოლებთ.“

შეხვედრების სტატისტიკა:

19/10/2010 ელ2 გაგრა – სამგურალი 4:0

08/04/2011 ელ2 სამგურალი – გაგრა 0:2

12/11/2015 ელ2 სამგურალი – გაგრა 1:0

24/04/2016 ელ2 გაგრა – სამგურალი 1:2

08/04/2017 ელ2 გაგრა – სამგურალი 0:0

27/05/2017 ელ2 სამგურალი – გაგრა 0:1

25/08/2017 ელ2 გაგრა – სამგურალი 2:3

03/11/2017 ელ2 სამგურალი – გაგრა 1:1

09/03/2018 ელ2 გაგრა – სამგურალი 1:0

11/05/2018 ელ2 სამგურალი – გაგრა 2:3

09/08/2018 ელ2 გაგრა – სამგურალი 1:0